四十五年，人生其實又有幾多個四十五年？
其實我自己既波齡只有十數年，記得以前看電視睇到無記播球迷世界我實轉台，因為覺得哩個節目既內容好悶，個波踢黎踢去為咩？
不得不承認，是朗拿度帶我入哩個圈，始於九八世界杯。
亦因為佢，我跟隨了國際米蘭…到今年第十二個年頭。
支持國際隊一刻已經知道莫拉堤這位主席，年年投入買新球員的資金都唔會手軟，炒教練又更加唔會手軟，強如所謂既納比都無一幸免，我記得既教練就已經有施蒙尼、鶴臣、納比、達杜尼、古柏、沙哲朗尼、文仙尼同埋而家既摩連奴。
講到我心中最支持既唔計摩連奴，就係古柏，佢係我心目中無咩其他人可以取代，甚至係之後既文仙尼我都覺得古柏所帶比國際米蘭既野遠比哩位所謂既少帥多的是…佢係莫拉堤在任是第一位真正的防守注入國際米蘭既陣式、思維入面既人，對比以往既國際隊，根本無可能諗到條防線可以咁緊密，將以往一貫既有前無後改變為防守反擊，雖然唔好睇，但實際，雖然贏唔到咩獎項，但以佢既人腳所造到既野，我覺得佢係為左國際之後既發展打下一個好好既基礎。之後因為所謂既電話門事件，令到文仙尼冷手執個冠軍返黎，為國際重奪自88－89年既第一個意甲冠軍，但真的，我到現在都對這個奈弱既人毫無好感，我不介意佢每年係歐冠都好失敗咁十六強出局，我最介意的還是他在晏菲路輸波後的辭職論，真的將佢既弱處表露無遺，係弱勢時完全帶唔到比隊波那怕是一點兒的信心。所以，當莫拉堤決定請摩連奴入主時，我是拍手叫好的，我心中亦有隨了他便別無他選的想法。
摩連奴的做事手法雖然令外界不齒，但作為球迷，佢係一個好比到信心大家既教練，佢能夠將一隊亂左近廿年既球隊執得整整齊齊，紀律鮮明已經好唔簡單，最重要既係比到隊波信心，哩兩個字唔可能咁快就建立到，但佢用左只有短短兩年時間就令到一隊散漫既國際，之前歐冠每次出局都會出現好多爭吵既國際，唔洗兩年就達咁既高峰，仲有邊個可以做到咁？佢唔單單每次賽士都做到幾日功課，佢仲將所有既焦點對准自己，完全將所有壓力包係自己身上，令到班波可以減少好多不必要既壓力，雖然仲有巴洛迪利哩個少不更事既天才不時為隊中製造麻煩，但我深信佢遲早到明白摩帥對佢既照顧係全方位，係為佢好的…摩連奴既性格絕對係需要挑戰，國際已經帶唔到咩挑戰比佢，雖然唔捨得，但佢係國際既任務可以話已經完結，佢想走好自然的我會夾道歡送的…就正如解除封印一樣，摩帥你而家自由了，你既成功比想像中要快太多了，身為國際球迷應該用最敬重的型式黎歡送摩連奴既離去，哩個係佢應得既選擇。
再者，國際米蘭最不能走的只有莫拉堤，一個為國際付出一生既人，一個一出世就注定係流藍黑血液既人。由佢接手國際開始，雖然行左唔少錯既路，炒左唔少好既教練，失敗、失敗再失敗，到連球迷都開始離棄佢，甚至辭職，比范察堤做會長。到因為范察堤病逝，重新接手國際米蘭，一改以往年年炒教練既作風，開始放下權力，由以往自己想點就點，變成由奧利亞歷＋白蘭卡組成既主管球隊日常事務，不再動不動破紀錄買人，開始為球會既收支著想，為球隊既安穩思考，開始聽大家既意見，自從佢再次成為主席，我見到既一年比一年進步，特別係轉會上今季更加係收到比使用既多，好多年都無見過，好多國際既球員都會視佢為父親，佢對朗拿度、列高巴既情我諗無其他主席可以做到，雖然有時係過份既愛護，但這些就正好係莫拉堤既特質，十五年了，佢終於等到…一個堅持一個信念
今場波係我地隊長第700場為國際出賽，好難得有一位球員為國際－一隊失敗左咁多年既球隊效力咁耐，國際最低潮時佢其實可以轉會皇馬，但佢無咁做，仍然留係國際，等一個可能佢一生都等唔到既冠軍…但今晚佢做到了，佢凍結左美斯、洛賓等等世界最頂級既球員，但佢已經即將38歲了，佢做球員既努力同態度，現今球壇真係無人能比。
三冠王，終於達成了。
仲好似發夢咁，國際米蘭能夠成為三冠
打敗其餘三大聯賽既冠軍
哩隊真係國際米蘭？
我仲係難以至信…
